U Rwanda rwegukanye imidari ine ya Bronze mu marushanwa Mpuzamahanga y’abatarengeje imyaka 21

Kuri uyu wa Kabiri tariki ya 3 Nzeri 2013 ahagana mu ma saa 12h00, nibwo ikipe y’igihugu ya Karate  y’abatarengeje imyaka 21 yageze ku kibuga cy’indege i Kanombe, ivuye mu gihugu cya Tunisie aho yari yaserukiye u Rwanda mu marushanwa Nyafurika y’abatarengeje imyaka 21 , iyi kipe izanye ishema kuko yabashije kwegukana imidari igeze kuri ine ya bronze muri ayo marushanwa.

Abana b’abakarateka bazanye imidari ine bayivanye muri Tunisia

Ingabire Solange umwe mu bakobwa bitabiriye ayo marushanwa akazana umudari wa Bronze, yatangarije Umuseke ko imbogamizi bahuye nazo ari uko bahuye n’abakinnyi bamenyereye cyane aya amarushanwa kandi bahabwa umwanya uhagije wo kwitegura kubera uburemere  bw’amarushanwa baba bagiyemo.Rurangayire Guy ushinzwe  tekinike muri FERWAKA yabwiye Umuseke ko n’ubwo bitari byoroshye kuri bamwe muri aba bana bato bari bitabiriye ya African Cadet and Junior Karate Championships bwa mbere.

Akaba yasabye cyane cyane ko abafite Sport mu nshingano zabo ko,  bagerageza kubaba hafi bakabafasha mu myiteguro, byaba na ngombwa bakababonera n’imikino ya gicuti ibafasha kumenyera amarushanwa nk’uko bikorerwa andi makipe kandi amenshi nta n’imidari azanira Igihugu nka Karate.

Uwayo Theo umuyobozi wa FERWAKA we yashimiye abo bana buri wese ku buryo yitwaye muri ayo marushanwa, ashimira umutoza Ruslan Adamov umaze kuzamura urwego rwa Karate cyane cyane mu bana bato.

Yasabye gukomeza gukora cyane imyitozo kuko bazitabira amarushanwa ku rwego rw’Isi mu kwezi kwa Ugushyingo 2013 kandi anabizezako bazabakorera ubuvugizi  kugirango imyiteguro izagende neza.

Amashyirahamwe y’imikino nka Karate usanga akunze gusaba ko ubushobozi bunganishwa no ku yandi mashyirahamwe y’imikino ahabwa na Leta amafaranga menshi, nyamara ngo  aya mashyirahamwe yandi yo iyo agiye mu mikino mpuzamahanga yitwara neza akazanira igihugu imidari.

Jeanne d’Arc wambaye ikote rigaragaza amabara y’igihugu yambikwa umudari i Tunis

Ingabire Solange na Rurangayire Guy baganira n’itangazamakuru

Jeanne d’Arc (ibumoso) na Aicha bamwe mu begukanye imidari bageze i Kanombe

Umutoza Ruslan Adamov wabatoje

Uwayo Theo umuyobozi wa FERWAKA avuga ko ibyo aba bana bakoze bishimishije

Bazanye imidari nk’iyi ine

 

Roger Marc Rutindukanamurego

FERWAKA.COM